East Garo Hills a·jani Rongrenggre L.P. School Basketball kal·chakramo Williamnagar District Basketball Association (WDBA) ni Surmount Basketball Club baksa apsan nangrime ong·atgipa Meghalaya Region Summer Basketball Tournament 2025 ni me·chik aro me·asa dolni final-rangko mijal salo susaangaha.
Ia final susaaniona Williamnagar Assembly constituency ni MLA aro Minister of Housing Department, Public Health Engineering Department, Soil & Water Conservation Minister Marcuise N. Marak mongsonggipa sokgipa ong·angaha. East Garo Hills ni District Sports Officer Smt. Babira G. Momin ba susaaniona sokbae bakko ra·angaha.
Me·asarangni final-ko Dubakh dol Di Tynrei baksa bilsugrike susagrikangaha jeon Di Tynrei dol skanggipa ge 2 quater o batsoe donggenchimoba Dubakh dolni krenge 3 aro 4 gipa quarter-o kal·anichi bon·kamao Dubakh dol 69 point-rangko man·e chegipa ong·angaha. Di Tynrei dol 66 point-ko man·aha aro 3 point-na mangmang banggijani palo gnigipa biapko man·angskaaha.
Me·chikrangni final-ko Salgro13 aro Diva Drive baksa susagrikaha. Ia susaanio Diva Drive dol 39-34 point-rangko Salgro13 man·e me·chik dolrangni gisepo final-ko cheaha. Salgro13 dol gnigipa biapko man·skaaha.
Meghalaya Region Summer Basketball Tournament 2025 ni me·asa dolrangni gisepo nambate kal·gipa Dubakh dolni Meban Shadap Most Valuable Player-ni boksisko man·angaha. Me·chik dolrangni gisepo Diva Drive dolni Riya Thapa Most Valuable Player ni boksisko man·angskaaha.
Kal·susaanio chegipa me·asarangni gisepo chegipa Dubakh dolna certificate-rangko trophy aro tangka gong hajal 50,000 ko on·angaha aro gnigipa biapko man·gipa Di Tynrei naba certificate, trophy aro tangka gong hajal 25,000 ko on·aha. Me·chikrangni gisepo chegipa Diva Drive dolna certificate rangko, trophy aro tangka gong hajal 25,000 ko on·angaha aro gnigipa biapko man·gipa North Garo Hills ni Salgro13 dol naba certificate, trophy aro tangka gong hajal 15,000 ko on·angskaaha.
