Baghmara Campers, Garo Hills-ni skanggipa eco-tourism agency mijal salni bako IIM Shillong o July 11-12 tarikona ong·anggipa IICA Northeast Conclave 2025 o mingsing minggamaniko man·angaha.
Ia salgnina ong·atanggipa conclave ko ‘Ideation to Incorporation’ katta bichongo pangchake ong·atangaha jeon apsan dake chanchigipa startup aro innovator rang Northeast-ni adita dingtang dingtang biaprangoni sokbae bakko ra·angtokaha. Program-ni bako a·songni Hon’ble Union Minister, Finance & Corporate Affairs Nirmala Sitharaman sokbaenba Baghmara Campers-ni Garo Hills-o tourism ko ra·doe kamrangko ka·anina ku·pattian baksana nama kamko dontongija ka·china didiangaha.
South Garo Hills a·jani nikkugijagipa nitobegipa ong·telaiggipa biaprangko niksengatna miksonge a·bachenggipa Baghmara Campers dingtang mancha forest camping, community guided tourism, A·chik jatni cha·a ringanirangko aro jatni bidingo u·iatna tom·anirangko dake songre songabatna namnikgipa manderangna A·chik jat ni daka rika, a·bri chiring, buring bolgrim baksa nangrimna cholko on·enga.
Ia conclave-o Baghmara Campers ni dilgiparangko mande ra·aniko dakangaha. Program-ni bako Baghmara Campers ni dilgiparang ia re·mikkanganiko a·bachenganisan ong·kuenga aro mikkangchi manderang bakrimaniko on·angode uamangko dal·rorona aro Garo Hills-ko niksengatna dakchakbeani ong·gen ine aganangaha.
