East Garo Hills a∙jani Rongrenggre L.P School Basketball kal∙chakramo Williamnagar District Basketball Association (WDBA) ni Surmount Basketball Club baksa apsan nangrime ong∙atenggipa Meghalaya Region Summer Basketball Tournament 2025 ni Me∙chik aro Me∙asa dolrangni skanggipa semi final rangko mijal salo kal∙atangaha.
Me∙chik dolrangni gisepo skanggipa semi final-ko Salgro 13 aro Williamnagar Loyola College dolrang susagrikangaha jeon Salgro 13 dol 37 points ko man∙e final-ona dosogipa skanggipa team ong∙aha. Williamnagar Loyola College 17 point-rangkosan man∙e sirikna nangao ga∙akaha.
Me∙asarangni skanggipa semi final-ko Dubakh A (seniors) aro Dubakh B (juniors) baksa kal∙skaaha. Ia susaanio Dubakh A (seniors) dol Dubakh B (juniors) ni kosako 47-14 point rangko man∙e chegipa ong∙angaha.
Ia Meghalaya Region Summer Basketball Tournament 2025 ko re∙anggipa July jani 9 tariko a∙bachengatangaha. Me∙a aro me∙chik dolni gnigipa semi final-rangko knal pringo kal∙anggen jeon me∙chik dolrangoni Diva Drive aro Active 10 susagrikanggen. Me∙asa dolrangni gisepo Sangkni dol aro Di Tynrei dol final-o biapko man∙a susaangskagen.
