Ma∙mong sorkarini Finance & Corporate Affairs Minister, Nirmala Sitharaman, LARITI auditorium-o program ong∙atgipao pangchakani ro∙ongko songangan baksa gong crore 1,087.81 mangni dingtang dingtang project-rangko a∙bachengate on∙angaha.
Mijalni program-o a∙bachengatgipa mongsonggipa project-rangara Special Assistance to State for Capital Investment (SASCI) ni ning∙o a∙dokni songadam biparango ge 750 digital library-rangko rikna gong 162 crore tangkarangko chamataha. Umiam lake-ko eco tourism-na namdape taridapna gong 120.81 crore aro gong 130 crore-ko Mawkhanu-ni 106 acre mang a∙ao MICE aro tourism-na rika cho∙anirangko dakna jeon Meghalayan Experience Theme Park, open-air amphitheatre aro manichakgipa biaprangko tarianggen.
Gong 732 crore mang tangkarangchi Mawkhanu robol stadium-ko residential football academy gnang tarina. Working Women’s Hostel rangko Shillong-o ge 400 palang donna man∙e, Tura, Jowai aro Byrnihat o 200 prak rikna gong 132 crore-ko tik ka∙aha jean me∙chikrangna dakchakaniko on∙anggen.
New Shillong CBIC na Office-cum-Residential Complex-ko tarina gong 256 crore aro una agreba Northeast Regional Campus of Indian Institute of Corporate Affairs, Mawkhanu-na gong 100.96 crore mang tangkarangchi tarina tik ka∙e project-rangko a∙bachengataha.
Nirmala Sitharaman program-o aganengon, Chief Minister Conrad Sangma-ni dilanina kusi ong∙nike uko mittelpilangaha. Uni agananigitade SASCI-ni ning∙o gong 5,400 crore tangkarangko chamataha jekon Meghalaya namen jakkalaha aro kamrangna kusi ong∙aniko parake gipin a∙dokrangde bon∙e name jakkalna man∙tokja ine ua aganangaha. Unikoa, Jal Jeevan Mission, PM Awas Yojana, PM Jeevan Jyoti Bima Yojana, Swachh Bharat Mission aro gipinrangoba namen dakaha ine Finance Minister aganangaha.
Union Minister-ni re∙baanian manderangni neng∙nikanirangko, nangnikaniko aro janggi tanganiko ma∙sie ra∙na gamchatbegipa ong∙a jean mikkangchina cholrangko on∙e dakchakna man∙gen ine Chief Minister Conrad Sangma aganangaha. Sorkarini model-rangko janape ia re∙baenggipa 2032 bilsio Meghalaya a∙dok India gimiko top 10-ni ning∙o ong∙na miksonganiko Sangma parakaha. Unikoa, a∙dokni economy-ko 10 billion USD ona ra∙dona miksonganiko aganange da∙o krenge kam ka∙anichi $6 billion economy sokna sepangengaha jean 15% mangnigita national average-ko niate tang∙dobatenga ine Sangma aganangkuaha.
Program-ni bako PM MUDRA, SVANidhi, PMEGP aro NPS Vatsalya ni ning∙o cheque rangkoba Finance Minister sualangaha. Unikoa, 2 MT anarosrangko LULU Retail Dubai-ona watatna flaq radoanikoba Minister ni jakchi dakangaha.
