Chang 39-gipa National Games jekon Meghalaya a·dok re·baenggipa 2027 bilsio sokachakaniko ka·atnasiengon na Meghalaya Athletics Association da·al salo selection trial ba seokaniko Pa Togan Nengminja Sangma Athletics Stadium, Tura-o ong·atangaha.
Ia seokanio Garo Hills-ni sak 200 kal·na sapgiparang dingtang dingtang kal·anirang jekai running ba katsusaani, jumping ba bilsusaani aro throwing ba gosusaani rango susagrikangaha.
Katsusaanio 100m, 200m, 400m, 800m, 1500m, 5000m aro 10000m rango susaangtokaha. Bilsusaanio Long Jump, High Jump, aro Triple Jump rango susaangan baksana gosusaanio Shot Put throw, Discuss Throw aro Javelin throw rango susaangtokaha.
Ia seokaniko West Garo Hills-ni District Sports Officer Saljagring M Marak, Meghalaya Athletics Association-ni Joint Secretary aro Sports Department-ni Athletic Coach Pleasantly Sunnah dakdilangaha.
