Chang 134 gipa Durand Cup ni Trophy rangko Tura songjinmaona sokbaaha jeko mesokangna a·dok sorkarini dakchakanichi Indian Armed forces rang jako ra·e dingtang mancha Roadshow ko ka·angaha. Ia Trophy ni Roadshow ko P A Sangma Stadium, Dakopgre, Tura oni a·bachengate Nazing Bazar, Araimile, Tetengkol, Hawakhana aro DC Office ramagita re·ange Tura Super Market Complex-o bon·kame matchotataha.
Trophy rangko Roadshow ka·e mesokanio aro ia tom·anio Meghalaya a·dokni Durand Cup ko ong·ataina aro bak ra·taina man·aniara bilonggen rasong chabeani ong·a ine West Garo Hills ni Deputy Commissioner Vibhor Agarwal aganangaha. Unbaksana national aro international gadangni kal·anirango chadamberangko bak ra·atna chol on·a sorkarini rakbee kam ka·anirangko janapangaha.
Iako aganengon, re·baenggipa 2027 National Games na dingtang dingtang rika cho·anirangko Tura aro Shillong songjinmao tarisamsoanirangkoba janapangaha. Uasan ong·aigija Meghalaya a·dok gimiko sports ko mongsonggipa ong·e ra·gatna sorkari academy, hostel aro bida pakwatram nok rangko pilak a·jani sports kal·na gisiko nanggiparangna rike on·angenga. Ia pilak kamrangko nike aro kragipa dakchakanirangko on·a man·angode mikkangchi Meghalaya a·dok sports ni a·bao niksenganggen ine Agarwal uni ka·dongsoaniko parakataha.
Ia tom·anio West Garo Hills-ni District Sports Officer Saljagring M Marak, Tura-ni saksa football kal·na sapgipa Sachin R Marak aro Indian Armed Forces-ni Subedar Rohit Das ba dongpae bakko ra·angtokaha. Unbaksana chang 134 gipa Durand Cup 2025-o Meghalaya a·dokni palo kal·nasienggipa dolrangna namgipa skaniko on·a Signature Campaign koba ong·atjolangaha.
