East Garo Hills, Nengkra A.we songo rikenggipa Children Adolescents and Digital Library-ko a·dok sorkarini nokdonggae on·a tik ka·aniko dingtang dingtang NGO dolrang nangrime jegalangaha.
Nengkra A·we songo songdongenggiparang baksa dingtang dingtang NGO-rang jekai Garo Students’ Union (GSU), Federation of Khasi Jaintia and Garo People (FKJGP), Garoland State Movement Committee (GSMC), A·chik Holistic Awakening Movement (AHAM), A·chik Dedicated Integrity Leaders (ADIL), All A·chik Youth Federation (AAYF) aro A·chik Progressive Approach (APA) dolrangni library nokko re·ange nirokaniko dakon rikgimin nokni chu·onggijani a·selo pakmarangni bretaniko, ki·chak su·buchakaniko name tarie on·gijajiko nikna man·aha. Indake bi·sarangna aro chadamberangni namgnina chamatgipa jinmani tangka paisarangko jakkalsretenga ine NGO dolrang parakataha.
Iani bidingo re·anggipa June 30 tarik 2025-o Block Development Officer (BDO) aro East Garo Hills-ni Deputy Commissioner-na u·iataniko dakon June jani gisepon nirokaniko dake kamrangko ka·angna agangenchimoba ma·mingba aganchakaniko man·jaha ine NGO dolrang aganangaha.
A·dokni bang·a multipurpose project-rangko Union Finance Minister nokdonggae on·angengon, indake rika cho·anirangko chu·ongagita kamrangko ka·gija chu·soke ka·aha ine ma·mong sorkarina mesokanian kakket ong·gijani ong·an baksana Nengkra songo songdongenggiparangko dal·e ra·gijani ong·a ine NGO dolrang raken jegalangaha.
