Sports ni a·bako tang·doatna aro rika cho·anirangko namdapatna Meghalaya a·doko India a·songni gisepo dal·batsranggipa Football Stadium ko gong crore 700 tangka paisarangchi rikna manchianiko Chief Minister Conrad Sangma parakangaha. Ia Stadium ko Mawkhanu Sports Complex-o antisani ja·manrang kamrangko a·bachengatanggen jekon 2027 bilsio matchotatgen ine aganangaha.
Ian dingtang mancha Meghalaya a·doko Football kal·aniko tang·doatna miksongani ong·a. Iasan ong·aigija, a·doko ge 50 artificial turf football stadium rangkoba tarina miksongenga jekon 2027 bilsini gisepo matchotatna jotton ka·angenga. Ia chamatengggipa projectrangoni da·o dipet ge 25 stadiumrangko rikengaha aro je bangki ge 25 rangko riknaba ra·chakaniko man·aha.
Ia ja·kuko de·aniara rika cho·ani gadang mangmangkosan tang·doatani ong·ja indiba maikai football kal·na gisik nanganiko baikamatna man·ani ong·an baksana a·dokni pilak biaprango chadamberangna namgipa gadango skie ra·e dal·angani cholko on·ange football ni a·bao niksengataniko man·anggen ine CM aganangaha.
A·dok sorkari indakgipa kamrangko ka·aniara mikkangchina niksamsoani ong·a aro football leaguerangko a·dokni pilak a·ja, block aro songrango kal·atna miksonganiko parakangaha. Iako aganengon, Mawkhanu-o stadium rikenggipako matchotatani ja·mano Meghalaya India a·songo mangmangsan niksenggipa ong·aigija a·gilsak gimikoba football ni a·bao niksengataniko man·gen ine Chief Minister aganangaha.
