Chang 134-gipa Indian Oil Durand Cup-ni ge gittam gamchatbegipa trophy-rangko State Convention Centre Shillong-o mesokaniko dakangaha. Meghalaya a·dok chang·satai a·gilsak gimikni ge·sa gitchambatgipa robol kal·susaaniko soka chaknasienganiko Chief Minister Conrad Sangma parakataha.
Ia trophy-rangko mesokani somoio Chief Minister Conrad Sangma, Sports Minister Shakliar Warjri, Air Officer Commanding-in-Chief, Eastern Air Command, Lieutenant General Air Marshal Suraj Singh, SM GOC 101 Area Lieutenant General Sanjay Malik, AVSM, SM COS HQ. Eastern Command Chairman DCOC Mohit Malhotra, adita millitary-ni Officer-rang, official-rang aro gipinrangba dongpae bakko ra·angtokaha. Ia trophy-rangko robol kal·susaaniko a·bachengatna skang Shillong songjinmani ramarango re·roroe mesokangaha, unbaksana Nongstoin aro Tura songjinmaoba mesokaniko dakanggen.
Ia chang 134-gipa Durand Cup-ko soka chaknagita Shillong songjinmako seokanina Indian Armed Force-rangko Chief Minister Conrad Sangma mittelpilskangaha. A·doko sorkarinigita sports-ni kamrangna bilsi 7 rangonin dakchake 70% nigita sports kal·chakramrangko rika choanirangko dake crore 2000 tangka paisarangko dingtang dingtang sports-ni project-rangna jakkal man·aha. Unbaksana gong 39.17 crore tangkarangko ge 26 sports association-rangna chamataha jekon re·baenggipa 2027 National Games-na ge 50 medal-rangko man·a miksonge tarisamsoanirango dakchakani ong·gen ine Conrad Sangma aganangaha.
Ia chang 134-gipa Durand Cup-ko re·baenggipa July 23 oni August 23 tarikona West Bengal, Jharkhand, Assam, Manipur aro Meghalaya-o ong·atanggen. Shillong songjinmao ge 8 kal·anirangko dakange quarter final aro semi final kal·aniko Jawaharlal Nehru Stadium-o kal·atanggen.
