Meghalaya a·doko ge·a gamani a·bao organic ba bisi grigipa biterangko bikote a·song gimiko bading chiwalanio nambatgipa ong·nagita miksongani gnang Meghalaya Natural & Organic Society for Livelihood & Innovation in Agriculture (MEGNOLIA), Mother India Farms Bengaluru-ni Agri-enterprise aro Ri-Bhoi a·jani game ge·e chagiparang chong·motan Tomonpo Anglong Organic Farmers Producer Company Ltd baksa meligrike da·al salo Memorandum of Agreement (MoA) ko soi ka·grikangaha.
Iako meligrike dakanichi a·doko man·gipa Kew anaros-rangko dingtang dingtang a·dokrangona aro a·song gipinrangona watate Meghalaya a·doko man·gipa bosturangko bariatna miksonge dakangaha. Tomonpo Anglong Organic FPC-ni ning·o bimingrangko segatgipa sak 300 ge·e game chagiparang Ri-Bhoi a·jani dam 6 songrango ia rokkomni anarosko ge·aniko dakenga.
Department of Agriculture & Farmers’ Welfare-ni Commissioner & Secretary Dr. Vijay Kumar D, Mother India Farms dolrang baksa golpogrike Farmer Producer Groups (FPOs) processing unit-rangni a·doko donganiko janapangaha. Sorkari uamangna dakchakaniko on·gen aro game ge·e chagiparangna tangka paisa man·ani cholrangko baridapatanian mongsonggipa miksongani ong·a ine Kumar aganangaha. Iako dakanichi jerangan anaros, haldi aro gipin bosturangko ge·a game cha·giparangna namgnikoba on·gen ine ua aganangkuaha.
Tomonpo 2017 bilsio ong·kataoni MOVCD-NER scheme-ni ning·o Directorate of Horticulture-ni dakchakanichi 500 hectare mang a·arangko baridapatna man·e 600-oni 800 MT-rangni anaros-rangko bilsiantian bikotenga. Batanggimin bilsi 6 ni gisepo mingsing minggamaniko man·e Mother Dairy aro Reliance Fresh dolrangna palatna man·enga. Anaros baksana e·ching, minil gisim, Khasi mandarin, te·rik aro komperam-rangkoba Tomonpo ge·aniko dakenga. Mother India Farms-ni CEO R. Durairaj, Meghalaya-o name dakna ka·donganiko parake MoA soi ka·anian namgipa ja·ku ga·ani ong·a ine aganangaha.
Ia MoA ni ning·o Mother India Farms tangka paisani bidingo aro Internal Control System (ICS) ko chu·gimik nirokaniko dakgen jeon training, nirok simsakani aro ge·a gamanio baridapatna bilko maming koros nanga gri ge·e game cha·giparangna on·gen.
Da·alni program-o Director of Horticulture-ni B.Mylliem Umlong, MEGNOLIA-ni Chief Administration Officer M. Lyngdoh Suiam, Ri-Bhoi-ni District Horticulture Officer Pranjal J. Dutta, Operations & Special Projects-ni Senior General Manager Raghavendra MT, FoodChain ID-ni Managing Director Chinmayee Deulgaonkar, Tomonpo Anglong Organic Producer Company Ltd-ni CEO Jogn Lyngdoh aro gipinrangba dongpae bakko ra·angaha.
