All Garo Hills MTET Passed Candidates Association 2021-2023, Shillong songjinmaona re·ange ru·uta bilsirangoni Lower Primary aro Upper Primary skul-rango skigipani kamna nisamsoe dongengani bidingo Education Minister Rakkam A Sangma-na Memorandum-ko on·angaha.
Adita bilsirangonin skigipani kamna rimnapaniko dakna dontongatani a·selo bang·a MTET pass ka·e donggiparang neng·nikanirangko man·an baksana mittamrangde dongimin bilsirangna badeangpilanina re·baenggipa salrango kamna rimnaptaianiko dakengon bilsirangko on·dapaniko dakchina All Garo Hills MTET Passed Candidates 2021-2023 dolrang aganangaha. Unbaksana kamna rimnapaniko batch-ni kri on·e 2021-2023 bilsio MTET pass ka·e dongiminrangna biapko on·chengchinaba Education Minister-na aganangaha.
Batanggimin 2021-2023 bilsirangode MTET-ko pass ka·na gita 82 mark-rangko man·a gita nangachim indiba aro 2025 bilsiode 68 mark-rangkosan man·a nangani giminba memorandum-o janapangjole uamangna skang cholko on·china Education Minister Rakkam A Sangma-o mol·molangaha.
