India-o donggipa ku·siktangrangko jakkale a·songko rasong chae re·dilangna nanganiko Union Home Minister Amit Shah Bristibar salo parakangaha.
“Main Boond Swayam, Khud Sagar Hoon” ki·tap-ko gitcham IAS, Ashutosh Agnihotri-ni segiminko janape a·songo jerangan English ku·sikko agangenchimode mikkangchi kratcha·ataniko man·gen ine Amit Shah aganangaha.
India a·songni dingtang dingtang jatrangni daka rika, itihas aro toromrangni bidingo ma·sina gita gipin a·songni ku·sikko nangdapjawa. Iako jotton ka·aniara namen altubegipa kamde ong·ja indiba anga ka·donga India a·songo songdongenggipa sakantian cheaniko man·gen aro changsatai a·songtangna mande ra·aniko ra·bae India-o jakkalenggipa ku·siktangchin a·songko re·dilanggen ineba Union Home Minister agandapangaha.
Prime Minister Narendra Modi “Panch Pran” ba ming bonga ku·rachakaniko dakenba Amrit Kaal o pangchakani ro·ongko songe on·anganiko dakanian sak 130 crore manderangni neng·nikanirangko namatna miksongani ong·a. Ian a·songko namroro silroroatna, nokkol ong·aoni jakgitel ong·na, apsan ku·cholsan ong·e nangrime dongna sakanti songdongenggipa manderangni dakna nanggni ong·engani gimin re·baenggipa 2047 bilsio-nide chu·gimik an·tang ku·siktangko jakkale chubatgipa gadango mongsonggipa ong·e re·dilanggen ine Amit Shah aganangaha.
Ia dingtangataniko ra·bana administrative officer-rangna training-rangko on·a nangnikanikoba Amit Shah aganangaha.
