June 19 tarik 2025, Bristibar salo Garo Hills-o songdongenggipa manderangni ru·uta salrangoni nangnike dabienggipa Additional Secretariat Complex-ko rikna Chief Minister Conrad Sangma Tura, Dakopgre-o pangchakaniko ro·ongko songe on·angaha. Ia Additional Secretariat Complex-ko rikna gita gong crore 156 tangkarangko sorkari chamataha.
Additional Secretariat Complex-ko rikaniara building complex-kosan rikenga ong·ja indiba manderangni nangnikaniko chu·sokatanisa ong·engani gimin ian Garo Hills-ni manderangna gisik ra·beani sal ong·gen ine Conrad Sangma aganangaha.
Garo Hills-ni manderang sorkarini dingtang dingtang kamrangna re·anioba neng·nikanirangko chagrongna nangengani gimin ia Additional Secretariat-ko kulie on·anichi a·dok sorkari Garo Hills-ni manderangna nambate dangdike on·a man·gnok ineba aganangaha. Unbaksana ia Additional Secretariat complex-ko 2027 bilsini January jaon matchotatna ka·dongsoanikoba Conrad Sangma aganangaha.
Tura-o riknasienggipa Additional Secretariat-o Chief Minister-na, Cabinet Minister-rangna, Chief Secretary-na aro gipin dal·dalgipa officer-rangnaba kutturirangko dona aro dingtang dingtang sorkarini department-rangnaba biaprangko donanikoba aganangaha.
Ia pangchakani ro·ongko songe on·ani somoio Meghalaya Assembly-ni Speaker Thomas A Sangma, Deputy Speaker Timothy D Shira, Deputy Chief Minister Sniawbhalang Dhar, Cabinet Minister A.T Mondal, Dr. Ampareen Lyngdoh, Marcuise Marak, Shakliar Warjri, Rakkam A Sangma, Paul Lyngdoh, A.L Hek, Comingone Ymbon aro Garo Hills-ni adita MLA-rangba dongpae bakko ra·angtokaha.
