Ampati joloniko Bangladesh a·songchina ro·ongrangko salani a·selo songdongenggipa manderangna neng·nikaniko on·enganina Civil Society A·chik Welfare Organisation (CSAWO) dol Deputy Commissioner Hema Nayak-ko gronge dontongatchina mol·molangaha.
Ro·ongrangko garirang nangana batpile gate salanichi sorokrangko nosto ong·atenga, chatro chatrirangna aro saa ding·giparangna kenbegnigipa ong·enga. Sorokrang apchangketenga, a·sel ong·anirang batenga aro hospital-rango nangchongmotgipa somoirango kamrangko ka·na neng·nikaniko on·enga.
South West Garo Hills a·jao rika cho·ani aro gipin bang·a neng·nikanirangko chagrongengani gimin namgipa cholrangko dakkuja dipet Bangladesh a·songona ro·ong salaniko dontongatchengna uamang didiataha. Nosto ong·gimin sorokrangkoba taritaie on·china aro mikkangchi nosto ong·aniko champengna kam ka·chinaba u·iataha. Unbaksana, ro·ong gatpretaniko nirikichina aro manderangko naljokatchina uamang mol·molangjolaha.
