Garo Hills Autonomous District Council (GHADC) ni Special Inquiry Committee (SIC) re·anggipa June 9 tarik 2025 o Executive Committee Resolution ni ning·o tik ka·gimingita jekon Notification No. GHADC/GAD/NF/396/2012 o pangchake Sukrobar sal June 14 tariko skanggipa changna GHADC Conference room-o tom·aniko dakangaha.
Ia tom·aniko Taxation-ko nirokenggipa council-ni Executive Member aro Convenor Grahambell Sangma ni dilanio ong·atangaha jeon nangchongmotgipa am·sandianiko ba inquiry ko ka·na “Internal Guidelines” aro “Meeting Guidelines” ba ja·rikna nanggipa niamrangko ra·gatna SIC chanchirimangaha. Convenor ni ge·etanio EM I/C Tourism Ashahel D Shira ko SIC ni Documentation Officer na seokaniko dakangaha.
Sumit Kumar Jain-ko GST Consultant songna nangchongmotgipa lekka pancharangko bikotna Committee dingtang mancha mol·molangan baksana file rangko sokatna kam ka·ani, obosta-o pangchake Consultant ko rim·ani bidingo aro maikai file rangko niamni a·palo parakatanirangko champengna SIC chanchirimangaha.
SIC ni gnigipa tom·aniko re·baenggipa Mongolbar sal June 17 tarik 2025 na somoiko donangskaaha jeon GHADC ni officer rang file rangko ra·ruraani aro kamna seokani bidingo talatna Committee na ku·pattianiko on·chinaba u·iatangaha.
