College of Community Science, Central Agriculture University (CAU), Tura-o Techno Incubation Centre (TIC) Jackfruit processing ba te·brongoniko dingtang dingtang cha·ani bosturangko tariani bidingo sal bri-na a·dok sorkarini Directorate of Food Processing training programme-ko ong·atangaha.
Ia Jackfruit processing programme-ko June 10 oni 13 tarikona ong·atgipa training o Department of Horticulture, Agricultural Technology Management Agency (ATMA) aro adita bading chiwale cha·giparangba bakko ra·angtokaha.
Ia program-o te·brongko indin nosto ong·e galaigija te·brongoniko dingtang dingtang cha·ani bosturang jekai papad, chips, mixture, squash, te·brong bitchil oniko jete ata ba maida tariani aro achar tarianirangko dake mesokangaha.
West Garo Hills-ni Deputy Commissioner Vibhor Agarwal ia program-ona mongsonggipa sokgipa ong·e bakko ra·e a·doko te·brongrang bang·e man·genchimoba jakkalgija indin gale donaigija songadam nokadamrango janggi tangani cholrangna jakkalna man·ani bidingo aganangaha.
A·doko te·brongni bol bi·pangrang lakh 4 ba 5 ni gita dongenga aro ian Garo Hills o bang·e man·a amgipa ong·genchimoba chu·onga gita tarichakgipa karkanarang dong·jani a·selo indin jakkalgija dona nang·ao ga·akenga. Komibeoba 10.87 lakh metric tonnes te·brongrangoniko gong 434 crore-rang man·ani donggenchimoba bilsiantian indin galna nangaona sokengani gimin ge·e game cha·giparangna aro bading chiwale cha·giparangna ian tangka paisa man·ani cholrangba ong·enganina te·brong-rangni gamchata bidingo College of Community Science Tura-ni Dean Dr. Jyoti V Vastrad aganangaha.
