Garo Hills aro a·dokni dingtang dingtang bakrango mikka jimbee wanasienganiko India Meteorological Department (IMD) parakataha. Meghalaya State Disaster Management Authority (MSDMA), pilak songdongenggipa manderangko mongsongbate chibima sambajol aro banna ong·ronggipa biaprango donggipa manderangko ia somoio nanggipa aro champengsona man·agita dakna nanggnirangko dakchina draatan baksa didiataha.
Re·baenggipa somoirango chi banna ong·na, a·a rurongna, goira godapna, chi skonganina aro bol be·dapna kengnirangna gnang. Iani a·selo nangan somoirango ta·rake dakchakna man·janaba gnang ine MSDMA parakataha. Chel·a biaprangona songre songgabatna nanggiparangkoba re·ongkatna skang ramarangni obostako u·ie ma·sie ra·chengchina aro mikka jimbemitingo songrejachina didiataha.
A·kawe, a·bri aro rika cho·ani sepangjol biaprango donggipa manderangko ia somoio simsake dongchina mikrakataha. Una agreba district-o daito gnanggiparangni parakatgipa koborrangrangko nijringchina aro simsaksona u·iatanirangko ma·sie ra·china janapataha. Ia somoio ong·enggipa aro re·baenggipa salrango ong·nasienggipa obostarangni bidingo district authority aro DDMA nirikianiko dakenga, unbaksana nanggipa ja·kurangko ga·na tarisamsoenga ine parakataha.
