Northeast a·dokrango songdonggipa manderangko Bristish-rangni World War I-ni somoio Europe china rimange dakgrikatani bidingo pangchake Wanphrang D. Diengdoh-ni tarigipa ‘Because We Did Not Choose’ jawilwatko May 24 tarik attam 5 bajio Tura District Auditorium-o mesoknasienganiko Joint NGOs Forum parakataha.
Ia jawilwat bang·a matgrikrangni bidingo gualgimin golporang aro kattarangko janape tarigimin ong·a. Iamangoni A·chik matgrikrangba bak ong·paa jekon da·o uamangni janggi tangko on·kange aro neng·skime dakgrik dinggrikani kattarangko itihaso agananirang komibea ba gualgimin gita ong·aha.
Civil society dolrang aro historian-rang A·chik jatni a·gilsakna on·kanganiko nike mongsongbate re·anggipa somoio Garo Labour Corps cenotaph-ko nosto ka·aniko niate uamangko mande ra·pilskana aro jringna gisik ra·kamnagita ia jawilwatko mesokna tik ka·aha. Ian uamangna jawilwatchi mande ra·ani aro WWI o dakgrik dinggrikani golporangko itihaso ripinganiba ong·gen ine bakrimgimin NGO dolrang parakataha.
Ia jawilwatko mesokani salo pilak manderangko, senior citizen, scholar, media, chatro chatrirang aro cultural organization rangko re·bae bakko ra·e niepachina okamatenga. Jawilwatko mesoknagita bang·a songsalko dilenggipa dolrang, ukilrang aro historian rang dakchakaniko on·aha. Jawilwatko mesokani ja·mano agangolpogrikanirang aro sing·anirangna aganchakaniba donggen.
