Tura songjinmani soa sima jabolrangko galchakenggipa Rongkon Songgitalo simsakjani a·sel jabolrang chiringgita joljol man·pakanganiko nikenga. Ian da·oni obosta ong·ja jekon pangna bilsian mikkarang jimbee waani ja·mano indakgipa a·selko chagronganiko nikna man·ronga.
Ia a·dam sepangjolo ma·mal ge·gnini gopramrangba gnang jeon sia bon·ani somoio a·kol cho·na chaktogijagipa bibarangni a·sel bang·a neng·nikanirangko on·a. Iasan ong·gija sepang jolo donggipa manderangnaba, unbaksana mongsongbate chiringni rongtalaniko nosto ong·ata aro chini jonturangkoba nisiataona ra·baa.
Jobolrangko nama bewalo galchaknagita bang·a dolrangni aro songsalni dilgiparang batanggimin changrango nirokchinaba janapaha. Chief Minister Conrad Sangma an·tangba ia a·damona re·ange nambate taridapna nirokaniko dakangaha. Indake ong·genchimoba ia obostani bidingo da·ona kingkingba maming ja·ku ga·anirang dongkujaenga aro salsana bate soa seng·ani batroroenga jean manderangna dongtogijaniko on·enga.
