A·dok sorkarini Directorate of Sports & Youth Affairs Department, Meghalaya Athletics Association baksa nagrime State Level Inter-School Athletic Meet 2025-ko SAI STC, NEHU Shillong Campus-o a·bachengataha. Ia Athletic Meet-ko May 20-oni 22 tarikona ong·atangggen jean a·dokni chadamberangna sports-ni a·bao an·tangtangni changa sapaniko mesokna namgipa chol ong·a.
Opening ceremony-ona Sports & Youth Affairs department-ni Joint Secretary, Richard Yanthan mongsonggipa ong·e sokbaaha. Unbaksa Meghalaya State Olympic Association (MSOA)-ni Working President, John F Kharshiing aro gipin officer rangba sokbatokaha.
Joint Secretary, Richard Yanthan program-o aganengon, ia susaanio mongsongbate chadamberangko sports aro athletics chi uamangni janggi tanganiko tarina man·ani bilko ma·sina amgen ine parakangaha. Re·baenggipa bilsirangoba sorkari sports-ni a·bao chu·sokgiparangko bikotna on·kangenga. Rika cho·anirangko bariatna tangka paisarangko chamanirang aro gipin tang·dodapani kamrangko ka·anirang sorkarini scheme rangko jakkalaniko mesoka ineba Yanthan aganangaha.
John F Kharshiing, Working President, MSOA, ia athletic meet-ko ong·atani re·baenggipa 2027 bilsio chang 39-gipa National Games-ko a·doko sokachaknagita namgipa tarisoani ong·a ine aganangaha. Sports & Youth Affairs department-ni Director, D. D Shira, ni u·iatanigitade ia meet-o sak 780 athlete-rang ming 46 dingtang dingtang kal·anirango susaanggen ine ma·sina man·aha.
