A·song gegnini gisepo dakgrik dinggrike sosojengjeng ong·engmiting somoio social media-o toromko aro India a·songko galone Pakistan-ko ra·doe agangipa NGH-oni me·asa chadambe sakgniko police dolrang rim·aha.
Ia mamlani bidingo May 15 tariko Bajengdoba police thanao case No. 14/2025 section 152/197(1)(d) BNS, 2023 ni ning·o mokordomako segataha. Iamang sakgni Bajengdoba thanani ning·o man·gipa Chorebolbok songoni Silgring D. Sangma aro Chambildam songoni Asbath B. Marak ong·a jekon da·al sal rim·aha.
Uamang social media facebook-o video-ko upload ka·aha jeon Pakistan Zindabad ine agananiko nikna man·aha. Iasan ong·aigija Hindu toromni kosakoba uamang namgija kattarangko jakkale aganaha. Bang·a manderang uni video-ko nike share ka·aha aro rang·san gimikchina gipangaha. Indake a·songni aro gipin toromni kosako agananiara India-ni tom·tomaniko aro ku·mong nangrime donganiko nosto ka·aona sokatgen ine Police dolrang aganangaha.
