A·doko pora skiani a·bako tang·doatna kam ka·anio Shillong Government College of Engineering ko All India Council for Technical Education (AICTE) ni rachakanichi Meghalaya a·doko skanggipa sorkarini engineering college ko chalaina man·a cholko man·anina a·dokni Chief Minister Conrad Sangma uni katchaaniko parakangaha.
Ia rachakaniko Meghalaya sorkarini Principal Secretary of Education na Letter of Approval (LoA), dated April 30, 2025 o pangchake u·iataniko on·angaha. Ia college North Eastern Hill University (NEHU) ni ning·o ong·e pora skiani course rangko on·anggen jean East Khan Hills ni Mawlai Kynton Massar-o ong·a.
Ia college-o Civil Engineering and Electrical Engineering ni ning·o ge·gni undergraduate programrangko 2025-26 bilsina a·bachengatna raiko on·angaha jeon sak 30 chatro chatrirangko course ge·prako rimnapanggen. A·dok sorkarini dongimin niam ba policy-o 10% ko Economically Weaker Sections (EWS) ba chol ong·gijagipa nokdangrangni bi·sarangna reservation ko dona tik ka·aha.
