Tura Medical College ni rika cho·anirang baditana kingking matchotanganiko Chief Minister Conrad Sangma mijal salo a·damona re·ange nirokangaha. Sangma ni nirokeaniko dakani ja·mano rika cho·ani kamrang 80% mangnigita matchotanina aro college ni rika cho·anirangko ia bilsini gisepon matchotna ka·dongsoanina uni chu·ongnikaniko parakataha.
Ia Medical College ni pilak rika cho·anirangko ia bilsini December jani gisepo matchotatna ka·dongsoaniko aganan baksana Hospital ko chalaina dingtang mancha private entity na pakwatna golposamsoaniko ka·anganiko aganengon ia hospital ni chu·gimik nokgipa ong·e a·dok sorkari jako ra·anggen ine CM parakataha.
Ia Medical College o dingtang mancha Meghalaya ni chatro chatrirangna nambata pora skianiko on·a aro chel·achi re·na nanggijanagita seat rangko chame donanggen ine CM aganangaha.
Pora skiani gadangko namdapatanisan ong·aigija Garo Hills ni aro songadam nokadamni manderangna nambata sanna bannani cholrangko ra·baani ong·gen jean a·dok sorkarini bimchipe kam ka·aniko mesokenga ineba CM aganangaha. Unbaksana Shillong Medical College ko 2025 bilsini September jao a·bachengatgen aro Tura Medical College ko 2026 bilsini September jao a·bachengatgen ine Sangma u·iatangaha.
