May 5 tarik 2025, Sombar salo Meghalaya Health Advancement Policy ni skanggipa installment-ni bako Crore prak ni cheque rangko Tura songjinmani Tura Christian Hospital aro Holy Cross Hospital na a·dokni Chief Minister Conrad K. Sangma on·angaha. Ian private hospital rango sagipa dinggiparangna nambata gadangni sanna bannaniko ra·bana dingtang mancha rika cho·aniko namdapatna chu·gimik Crore 2 prakko on·a miksongenga.
Tura, Working Women’s Hospital o tom·ani programme-o aganengon, Chief Minister Conrad K. Sangma manderangna bimchipe hospital-rangni kam ka·aniko de·mittele a·doko sanna bannani gadangrangko namdapatna dal·a miksonganirang donga ine talatangaha. Unbaksana Shillong Medical College ko 2025 bilsini September jao a·bachengatgen aro Tura Medical College ko 2026 bilsini September jao a·bachengatgen ine Sangma u·iatangaha.
Adita biaprango bijolina neng·nikanirangkoba janapange, Garo Hills-o gital substation ge·gittam ko rikenga ine CM aganaha. CM Care Plus scheme-ni ning·o fund rang chu·onga ba chu·ongjani kri tangka paisarangko chamatna man·genchimode, bilonge sagipa sabisirangko man·e neng·nikgiparangna tangka Lakh 3 oni Lakh 10 ona kingking on·e dakchakaniko on·anggen. Unbaksana doctorrang je hospital-rango kam ka·na sikgenchimode uamang an·tangtangni namnikgipa hospital rangona re·ange kamko ka·na man·gen jeon uamangni kam ka·ani bond-ni nanggiparangko chu·sokate on·a kamko ka·angen ineba Sangma agandapangaha.
Ia tom·bimonganiona West Garo Hills ni Deputy Commissioner Vibhor Agarwal, District Medical and Health Officer Jakrambal A. Sangma, Medical Superintendent, Tura Christian Hospital, Dr. Editha W Momin, DM Nephrology, Tura Christian Hospital, Dr. Benjamin S Sangma, Administrator, Holy Cross Hospital, Sister Praveena, Medical Superintendent, Holy Cross Hospital, Dr Sister aro hospital ge·gnini bakrimpagipa official-rangba bakko ra·angtokaha.
