Da·al salo Baljek Airport, Jengjal-o Operations & Maintenance (O&M) and Communications, Navigation & Surveillance/Air Traffic Management (CNS/ATM) ni bidingo Airport Authority of India (AAI) baksa a·dok sorkari MoU ko soi ka·grikangaha. Ia MoU ko soi ka·anichi Baljek Airport-o sak 20 na chakgipa aeroplane ba sildorengko bilatna a·bachengatna kamrangko ka·anggen.
Ia tom·aniona mongsonggipa ong·e Chief Minister Conrad Sangma aro Meghalaya Industrial Development Corporation (MIDC) ni Chairman James K Sangma sokbae bakko ra·angaha. Una agreba Dadenggre ni MLA Rupa Marak, West Garo Hills ni Deputy Commissioner Vibhor Agarwal, AAI ni dilgiparang aro gipin officialrangba bakko ra·angtokaha.
Iako chu·sokatna man·anian mikkangchi Baljek Airport ko dal·dapatna aro rika cho·ani kamrangko namdapate dal·dalgipa sildoreng rangko bilchongatna cholko ra·bagen ine Chief Minister Conrad Sangma aganangaha. Garo Hills-o Baljek Airport mikkangchi logistics hub ba bostu watchakram biapna dingtang mancha sapa maina Jengjal oni gipin a·songrangonaba sepangrikani gimin ia Airport ko chalaina a·bachengtanichi re·baenggipa bilsi 30-50 ona niksamsoe kam ka·ani ong·a ine CM aganangaha.
Ian Garo Hills ni manderangna mikkangchi airport ko chu·gimik matchote chalaina man·ani ja·mano namgnirangko ra·baan baksana kamaiani cholrangko ra·bana dakchakanggen ine MIDC ni Chairman aro Dadenggre ni gitcham MLA James K Sangma tom·anio bak ra·gipa sakantinan uni katchabeaniko parakangaha. Iako aganengon, dingtang mancha biapko namroro silroroataniara sildoreng gita songre songgabataniko namdapatesa man·gen aro kamrangko bikotani cholko ra·baan baksana a·jao apsangrik ong·e tang·doaniko ra·bana dakchakanggen ine MIDC ni Chairman aganangaha.
Mikkangchi bading chiwalanio, tourism ni a·bao aro jolna dingtanganiko ra·bae cholrangko bikotna Baljek chu·gimik tarisamsoenga aro ian nambata cholrangko ra·baanio a·bachengatanisan ong·kuainga ine aganan baksana iani gadangna baten mikkangchi jolona namgipa kamrangko ra·bakugen ine James Sangma aganangaha.
