Raksamgre Civil Sub-Division ni ning∙o man∙gipa Uringgre Govt. LP school-ni namjabegipa obostako nike Bawegre Sub Unit AHAM dolrang ta∙rake taridape on∙china Education Minister Rakkam Sangma-ko mol∙molataha.
Uringgre LP school-ko 2006 bilsioni a∙bachengaha jean da∙o namen nosto ong∙aha ine AHAM dol parakataha. Ia school-ko a∙bachengaonin da∙ona kingkingba maming nirokani aro apalbata donggijanikoba uamang Education Minister-na janapataha.
Ru∙uta bilsirangna galchipani a∙sel nokkingrang namjabeani gimin mikka bitchirang selenga aro wachi kario class-rangko ka∙chakna neng∙nikaniko on∙a. Be∙gimin do∙ga kelkirang aro kutturirang nosto ong∙anichi maming naljokaniba dongjaha. Iarangni a∙sel poraia skiani gadangko tang∙onata aro bi∙sarang school-ona skie ra∙na re∙bana gong∙ja aro sinjetaniko ra∙baa ine AHAM u∙iataha.
Uni gimin uamang ia Uringgre Govt. LP school-ko taridapnagita aro rika cho∙ani kamrangko ka∙na ta∙rake tangka paisarangko chamatchina Education Minister Rakkam Sangma-o mol∙molataha.
