Salgittamna ong∙atanggipa Synergy 2025, Inter-College Students’ Exchange Programme May 3 tariko DBCTE Hall-o matchotangaha. Bon∙kamgipa salo Education Minister Rakkam Sangma mongsonggipa ong∙e sokbaaha aro unbaksa Education Department-ni Advisor HM Shangpliang-ba bakko ra∙angaha.
Rakkam Sangma, program-o aganengon, poraia skianio bil∙akgipa pangchakani ja∙pangko tarina nanganiko mongsonggipa ong∙e aganangaha. Ua chadamberangko bang∙a bakrango jekai sports aro poraia skianio chu∙sokgiparang ong∙china didiangaha.
HM Shangpliang-ba uni speech-o me∙sugipa golporangko aganangaha aro chatro chatrirangko uamangni cholon bewal aro miksonganirangko dingtangatchina ku∙pattiangaha jeon ua IT aro corporate sector-o chol donggiparangko janapangjolaha. Bidako gamchatnike ra∙china aro chu∙sokanina rikgiparang ong∙chinaba ua chatro chatrirangko didiangaha.
Ia salgittamni program-ko DBC Tura-ni IQAC ong∙ataha jeon songjinmani ge 6 college-rangni bi∙sarang dingtang dingtang session-rango jekai career-ni bidingo talatani, jera ra∙ani, open mic, quiz, role-play aro cultural program-o bak ra∙angaha. Bon∙kamgipa salo chatro chatrirang an∙tangtangni ma∙siani aro skie ra∙ani gimin Synergy program-ni bidingo aganpilanirangko dakaha.
Synergy 2025 program, chatro chatrirangni gisepo saksa sakgipinoniko skie ra∙na, golporimna, apsan daldrona, bakrimani aro ku∙cholsan ong∙ani bewalko ra∙bana namgipa a∙damko on∙aha. Bakko ra∙gipa college-rangni chadamberangna gamchatgipa upadi lekkarangkoba mongsonggipa sokgiparangni jakchi on∙aniko dakangaha.
