Meghalaya Board of School Education (MBOSE), HSSLC 2025 porikkani Arts, Science, Commerce aro Vocational stream-ni result-rangko da∙al sal parakataha. Ia porikkako February 18-oni March 19 tarikona ong∙ataha.
HSSLC 2025 porikkao Arts-ni a∙bao sak 22,835, Science-o sak 3,922, Commerce-o sak 2,501 aro Vocational stream-o sak 20 mang seaha. Chu∙gimik porikka segiparangoni Science-o sak 3,253 (82.94%), Commerce-o sak 2,033 (81.28%), Arts-o sak 18,736 (82.05%) aro Vocational stream-o sak 17 chu∙sokaha jean 85% mang ong∙a. Ia bilsini HSSLC porikkao chu∙gimik sak 29,278 mang chatro chatrirang setokaha.
Top 10 gadango rank man∙e chu∙sokgipa chatro chatrirang mongsongbate songjinmani skulrangoni ong∙a. Ia chang Garo Hills-oni Top 10-ni gadango Arts stream-o brigipako Don Bosco College (Hr. Sec section) Tura-oni Neev Sharma aro Science-o 10-gipako Don Bosco College (Hr. Sec section) Tura-ni Samridhya Das man∙aha. Commerce stream-o darangba gadang 10-ni ning∙aona sokdogipa dongjaha.
Indake ong∙genchimoba chu∙sokgiparangni gisepo adita chatro chatrirang Garo Hills-oniba dingtang dingtang subject-rango jekai Garo (MIL), Garo (Elective), Assamese (MIL), Assamese (Elective), Sociology aro Electronic & Hardware-ni a∙barango bang∙bate marks man∙giparang dongangaha.
