Mijal salo Don Bosco College Tura skanggipa changna Synergy 2025 chong·motan Inter-College Students’ Exchange Programme-ko Don Bosco College of Teacher Education (DBCTE) hall-o a·bachengataha. Ia program May 1-oni joljol 3 tarikona salgittamna ong·gen.
Ian Tura songjinmao dongenggipa adita dingtang dingtang college rangni chatro chatrirangna dingtangmancha apsan ku·cholsan changa sapaniko, u·ianirangko suale ra·enba skigrike ra·na namgipa cholko on·gen.
Synergy 2025 oprakani program-o West Garo Hills, Deputy Commissioner Vibhor Aggarwal mongsonggipa ong·e sokbaaha. Ua program-ni bako aganengon, indakgipa tom·anirang dal·drobaenggipa chatro chatrirangna mongsongbatgipa ong·a ine janapan baksana iako District level-oba ong·atna jotton ka·na nanganiko parakangaha. Unbaksana tom·anio bakko ra·enggipa chadamberangna an·tangtangni janggi tanganio daldal·gipa miksonganirangko donchina didiangaha.
Don Bosco College Tura ni Principal Rev. Fr. Januarius S. Sangma, tom·anio rimchaksoani kattarangko aganengon Synergy program-ni gamchatani bidingo agan talate on·angaha.
Ia salgittamna ong·tenggipa Synergy o chatro chatrirangna banga dingtang dingtang bimang aro gisik nangatgipa session-rang, career-ko ma·sina dakchakani, da·o ong·enggipa songsalni bidingo a·gilsakni cholonni gamchatani bidingo agangrikani, an·tangko parakatna cholko on·ani open mic session-rang, gisikko bilakatchina dakchakgipa porikkarang, meligrikani role-play rang, aro daka rikaniko unbaksana changa sapaniko mesokna cholko on·agita cultural program rangba gnang.
