Garo Hills-ni civil society organization-rang Tura Babupara-o donggipa WWI cenotaph-ko namdape taridapanio tender-ko on∙ani bidingo mikkang niteanina Urban Affair Minister-na nirokatchina mol∙molataha. Ia beautification project-na chamatgipa tangkarang gong crore 2 mangni ong∙a ine uamang janapataha.
RTI ka∙anio man∙anigitade, 2024 October 1 tariko notice ong∙katgipao ia kamna tender galaniko ra∙chakna 2024 October 18 tarikko bon∙kamgipa salna donataha. Indake ong∙genchimoba Tura Beldarpara-oni Dhurup Prasad, Earnest Money Deposit (EMD) ko 2024 November 14 tariko ka∙aha jean ra∙chakani bon∙kamgipa tarikna jasa batna am∙pilaha ine uamang parakataha.
Unikoa, comparative statement-oba EMD ni status-ko ‘yes’ ba tik ong∙aniko mesokaha. Iasan ong∙aigija, uni lekka pancharango CEO-ni on∙a nanggipa soirangba dongja jean kam ka∙anirango niam gri dakaniko mesoka ine uamang janapataha. Ian niamko pe∙ani, parakgija dakani aro tender on∙anio mikkang niteanikoba mesoka ine parakataha.
Uni gimin ia am∙sandie man∙gipao pangchake Urban Affair office-oni kakketgipa aro mikkang nitea grigipa am∙sandianiko dakchina uamang mol∙molataha. Ia kamko ka∙na tender ra∙chakani kamrangkoba da∙o dipte ta∙rake dontongatchengchina u∙iataha. Unbaksana, official-rangni gisepo niamni a∙palo re∙aniko rim∙a man∙ode raka ja∙kuko de∙china aro manderangni tangkako naljokatna man∙agita namgipa re∙mikkanganiko dake daito gnanggiparango ka∙donganiko ra∙bapilchina uamang mol∙molataha.
