May 1 tarik 2025, Bristibar salo Cabinet tom·aniko ong·atanio adita nanganirang aro dingtangatanirangko chanchirimenba namnike ra·chakangaha.
Ia tom·anio a·dokni secondary skulrangko Higher Secondary gadangona ra·dona aro Higher Secondary-o gitalgipa stream-rangko on·dapaniko dakna tik ka·aha. A·dokni Higher Secondary skulrango da·o dipet ge hajal 52,067 seat-rang donga, iarang mongsongbate jillarango aro Khasi-Jaintia Hills-o ong·a. Indake ong·engon da·o chu·gimik hajal 12,000 mang seat-rangnigita chu·onggija dongkuenga.
Uni gimin ia kolgapgipa biaprangko gapatna ge·dok sorkarini secondary skulrangko higher secondary-ni gadangona ra·doatna cabinet tik ka·aha jeon hajal 9,000 mang seat-rangko bikotdapani ong·gen. Unbaksana, ge 11 higher secondary skulrango gital stream-rangko on·dapna ra·chakaha.
Meghalaya Vehicle Scrappage Policy 2025-ko ra·chakange ia niamnigita a·dok sorkari, bilsi 15 ba una bate gitchambatgipa bol hajal 5 sorkarini garirangko ra·galchenggen aro uni ja·mano bilsi 35 ba una bate gitchambatgipa bol hajal 8 private garirangko ra·galaniko sorkari dakanggen.
A·doko sanna bannaniko namdapatnagita ma·gitcham pagitchamrangni dakbewalrang jekai Ayurveda, Homeopathy, Yoga aro Naturopathy-ko songadam nokadamrango sanna bannanio dakchakaniko on·anina AYUSH Medical Service Rules 2025-ko namnike cabinet ra·chakangaha.
Ia tom·anio Meghalaya Civil Defence & Home Guard Department Service Rule, 1989-ko Director of Civil Defence-ni kamko olgrokatna adita dingtangatanikoba dakaha. Da·o dipete ia kamrangko Home Guard-ni Commandant General jako ra·e kam ka·enga.
