Adita songrango MGNREGA ni kamrangko niamni a·palo ka·enganina aro tangka paisarangko jakkalsretanina Confederation of Meghalaya Social Organisations (COMSO) dolrang West Garo Hills ni Deputy Commissioner na chitti see ia kamrangni bidingo name dake am·sandichina dabiangaha.
Iako janapengon, COMSO dolrang dingtang mancha Demdema Block ni ning·o donggipa Village Employment Council (VEC) rang jeon Muslim rangni songrango kam ka·anirangko name dake nipiltaichina DC ko aganangaha. COMSO ni agananigitade Demdema block-o 2020 oni 2025 ona job card sualanirang niamni a·palo ong·a jeon bang·a manderang job cardrangko man·a kragijagiparang ong·a ine janapangaha.
Nokprako saksa mandena agreba nokdangni gipin manderangni bimungoba job card rangko sualan baksana badiaba songrango bi·sarangni bimungoba sualengako rim·a man·aha ine parakangaha. Ian Muslim jelgipa biaprango job card sualanirang baririkaniko nikna man·enga aro ia niamni a·palo jak donggipa data entry operator ni bimung koba COMSO dolrang parakataha.
Ia pilak kamrangko high-level magisterial inquiry nigita name dake am·saniako dakchina aro ia kamo jak donggipa officiarangko kamoniko dikdikasana neng·takatchina dabiangaha. Unbaksana job card aro hajira rangko name audit ka·na dabian baksana mikkangchi indakgipa obostaoni naljokatna jak donggipa manderangni kosako kragipa sastiko on·china COMSO janapangaha.
