East Garo Hills Williamnagar ni Circuit House o Member of Parliament (MP) Saleng A Sangma ma·mong sorkarini a·dokna chamatgimin schemerangko nipiltaina District Development Coordination and Monitoring Committee (DISHA) tom·aniko ong·atangaha.
Ia tom·anio East Garo Hills ni Deputy Commissioner Vibhor Aggarwal, line department ni dilgiparang aro DISHA ni memberrangba bakko ra·angtokaha.
Ma·mong sorkari ni scheme rang jean DRDA, Health, Education, Animal Husbandry and Veterinary, DCIC, PHE, Health, Agriculture, ICDS, Fisheries, PWD, Social Forestry, Water Resources, Soil and Water Conservation, Seticulture, Horticulture aro dingtang dingtang department ni ning·o kam ka·atenggipa kamrangko nipiltaianiko dakangaha.
A·jao dingtang dingtang scheme rangko man·a kragipa manderangna sokate on·china department ni dilgiparangko Saleng Sangma didiangaha.
Una agreba ma·mong sorkarini schemerangna chamatgimin tangka paisarangni bidingo chanchiriman baksana manderangni chagrongenggipa neng·nikarangko aro scheme rangko mai bewalo kam ka·atanikoba ia tom·aniona chanchirimaniko dakangaha.
