West Garo Hills ni Upper Darengre songo College of Community Science Tura ni B.Sc ko poraienggipa 4th year ni chatro chatrirang Rural Agricultural Work Experience (RAWE -2025) programme ko sal 80 na ong·atangaha.
Ia programme ko ong·atanichi song noko janggi tangani gadang, daka rikani aro u·ie ra·na nanganirangko Participatory Rural Appraisal (PRA) nigita chatro chatrirangna ma·siatna cholko on·angaha. Una agreba cha·ani tariani ba food processing ni a·bao training on·an baksana ge·a gamani galchipgimin bosturangoniko pul aro agarbatti rangko tarina skiangaha.
Ia programme-o bi·sarangko namgipa bewalo dal·atna aro me·chikrangna uamangni bakrangni bidingo talataniko on·angaha. Unbaksana songnokni manderangna baikamgipa bewalo uamangni songko namroro silroroatna aro tangka kamaiani cholrangkoba skie on·angaha.
Bon·kamgipa salo ia programme o tarigimin bosturangko manderangna mesokangaha jekon CCS ni Dean Dr. Jyoti V. Vastrad, BSF DIG ni jikgipa Puneet Sharma, Tura ICDS cell ni sakgni supervisor Flora Marak aro Monika Raksam bakko ra·e dilangaha.
