Songadam nokadamrangona rika cho·anirangko namdapatna manchie rama jal·angrang sokugijagipa ge 750 songrangna Pradhan Mantri Gram Sadak Yojana (PMGSY) Phase IV ni ning·o napate kamrangko a·bachengatanggen ine Deputy Chief Minister Prestone Tynsong u·iatangaha.
Tynsong ni Garo Hills ko salgnina wenanio, department nigita adita tom·anirangko dake dingtang dingtang rama jal·angrangni project rangko nirokangaha jeon ua uni chu·ongnikaniko parakangaha.
Ia 750 mangni songrangona rama jal·angarangko sokatna PMGSY-IV ni ning·o kamrangko ka·anggen jekon a·dokni Public Works Department (PWD) ko Detailed Project Reports (DPRs) rangko tarina, tender rangko on·a aro Ministry of Rural Development ni niamo pangchake somoigita kamrangko a·bachengatna daitoko donangaha.
Batanggimin somoirango PMGSY nigita Garo Hills o namgipa kamrangko ka·anina a·dokni PWD aro engineer rangko Tynsong de·mittelangaha. Unbaksana PMGSY-I, II aro III gipa phase ni ning·o tarienggipa ramarang matchotnasiengaha aro bang·bataan ia bilsini bon·achipak matchotna ka·dongsoenga ine Tynsong aganangaha.
