Khasi aro A·chik ku·sikrangko a·dokni pilak skulrangon class IV ona kingking nangchongmotgipa subject ong·e ra·gatna gital niamrangko Education Department janapataha.
Khasi aro Garo subjectrangko skulrango ra·gatna skang pilak skigiparang, ma·gipa pagiparang, chatro chatrirang, songko dilenggiparang aro sorkario kam ka·giparangko an·tangtangni ku·pattianirangko janape May-ni 9 tarikna skang see watatchina aganangaha.
Skul-rango chatro chatrirang jerangan Khasi aro Jaintia ku·sikko agangiparang Garo ku·sikko skie ra·na man·gen aro A·chik chatro chatrirang Khasi ku·sikko skie ra·aniko dakna man·angskagen.
2020 bilsini National Education Policy (NEP) ko ja·rikani gita ku·agananirangko skina gita dakchakaniko on·a miksonganio ong·a aro a·doko jatni daka rika bewalrangko ripingna apsan nangrime kam ka·aniba ong·enga ine Education Department-ni Commissioner & Secretary in-charge Vijay Kumar Mantri aganangaha.
Khasi aro A·chik ku·sikrangko skina sapgipa skigiparangko a·dokni pilak biaprangni dam 9,665 primary skulrango kamna rimnapaniko dakna miksonganiko Kumar aganangaha.
Chatro chatrirangna sapgipa skigiparang dongjani a·selo neng·nikanirangko olgrokatna, sorkari bilingual textbook ba minggni ku·sikchi talate on·gimin ki·taprang baksana skigiparangna dingtangmancha training rangko on·anganikoba aganangaha.
