Da·al salo North Garo Hills-ni Meghalaya Pradesh Youth Congress (MPYC) baksa District Congress Committee, Block Congress Committee aro District Youth Congress apsan nangrime salantio jakkalenggipa bosturangni damrang barianina jegalaniko dakangaha.
District Youth Congress Committee -ni President, Jakgrik Momin, salantio nanggipa bosturang jekai petrol, diesel aro LPG gas-rangni damrang bariani a·selo kangal cholgri nokdangrangna, ge·e game cha·giparangna, bading chiwalgipa aro sakantinan namen neng·nikaniko on·enga ine parakataha. Ua ma·mong sorkarini manderangni neng·nikaniko nirokgijanikoba sing·doataha. Kakketko agangenchimode ia bosturangni dam jringnan barianiko nikronga ine Momin aganangkuaha.
A·gilsako crude oil-ni damrang tangonahaoba India a·songo petrol, diesel aro gas-ni damrang tang·onjawa. Indide sorkari iani bidingo mai ka·donganiko on·aha aro maiko dakaha, dam rake palenggipa torangni tangkarang bachi aro sani ning·o napenga ine Momin sing·doataha. Uni gimin ia ong·enggipa pilakkon nirokate manderangni neng·nikaniko chelatna sorkari kamrangko ka·na nangchongmota ine ua agandapangaha.
