Tura Babupara-o tarigipa WWI cenotaph-ko taripiltaina bang·a so·sojengjeng ong·aniko chagrongani ja·mano Chief Minister Conrad K. Sangma project-ko a·bachengna skang manderang baksa golpogrikchenge kam ka·gen ine aganangaha. Cenotaph-ko maming u·iata donggija nosto ka·ani gimin Garo Hills-ni dingtang dingtang NGO-rang, civil society organisation-rang, senior citizen, political party-rang aro gipinrang raken jegalangtokaha.
Bang·a dolrangni jegalaniko man·ani gisepo gital committee-ko PHE Minister Marcuise Marak dilanichi bikotaha ine CM Conrad Sangma parakataha. WWI o dakgrikgipa A·chik matgrikrangko nambate mande ra·na, unbaksana itihasko chu·ongagita mesokna, France aro gipin a·songrangoniko see jote rakkianirangko Marak-ni re·dilanio nigrike chanchirimanggen ineba Sangma aganangkuaha.
Ia committee, cenotaph-ko taripiltaina pilak dakna nanggnirangko nigrike kam ka·angna Sangma ka·donganiko on·angaha. Sorkari iako France a·songchi re·ange dakgrikgipa matgrikrangko gisik ra·nagita dakenga aro ia miksonganiosa gital cenotaph-ko tarina tik ka·aha ine ua aganangkuaha. Cenotaph ko tariengon pilak manderangni namnikagita mongsongbate matgrikrangni nokdangrangko mande ra·a gnang dakna Sangma ka·donganiko parakangaha.
