West Garo Hills, Tura Polytechnic-o poraiani a·barangko apaldapate on·china aro Mendipathar College-o Science Stream-ko man·chapatchina Meghalaya Pradesh Youth Congress-ni President Timjim K. Momin, Chief Minister Conrad Sangma-na chittiko sedoataha.
Momin, Tura Polytechnic-o Civil, Mechanical, Electrical aro gipin Engineering department rangko on·dapchina janapataha. Iarangko on·dapanichi poraia skiani cholko on·an baksana chatro chatrirang industry aro unbaksa nangchapgipa a·barango u·ie ma·sie ra·na man·gen ine Momin parakataha.
Shillong aro a·palchini gipin city-rango pangchakna nanganikoba komiatna man·anggen. Bida pakwatgipa a·damrangko a·palatanichi songtang noktangni bi·sarangna kam ka·e cha·ani cholko bikotani ong·gen. Unikoa, Atmanirbhar Bharat (Self-Reliant India) baksa a·dokni niksamsoe kam ka·aniko on·gilpana, unbaksana entrepreneur rangko tang·doatna aro songadam nokadamrango engineering aro technical-ni a·bao gital chanchianirangko ra·bana man·gen ine Momin aganangaha.
North Garo Hills a·jao bilsiantian poraienggipa chatro chatrirang batrikrikengani gimin Mendipathar College-o Science stream-ko ra·bae on·chinaba Momin janapataha. Science-ko poraina nambata cholko on·genchimode bang·a gisiko nanggipa chadamberang jemangan medical, engineering, IT, agriculture aro scientific research-rangni bidingo poraina cholko man·anggen ineba MPYC-ni President chittio janapangaha.
SSLC porikkao pass ka·ani percentage-rang bilsirikatan batroroengani a·selo chadamberang poraina ma·brangatako man·a. Uni gimin sorkarini office-rang, department-rang aro gipin bak donggiparang baksa nangrime kam ka·e ia bida pakwatram a·damrango dingtang dingtang chu·onggijanirangko ra·bae on·china Momin didiataha.
