Tura Government College, mijal saloni uamangni Annual Sports Week-ko Te·teng a·ja kal·chakram bakrao a·bachengataha.
Opening Ceremony-ko ong·ataniona college-ni Vice Principal Lucietha Sangma aro gipin skigiparang sokbae sports week-ko oprake on·angaha. Uamangni re·bae bakrimanian iandakgipa college-ni dal·bea tom·bimonganiko mikkim gnangataha ine Tura Government College Students’ Union (TGCSU) ni Vice President Metchial R. Sangma parakataha.
A·bachengani salo adita kal·anirangko ong·atangaha jekai volleyball, paga salsusaani aro gipin susaanirangko kal·ataha. Skanggipa salo bang·a chatro chatrirang sokbae kusi ong·been bakko ra·angtokaha. Ia Sports week-ko a·bachengatna man·anina TGCSU ni Vice President mittelpilatan baksa tom·tome matchotna man·agita nama skaniko on·ataha.
