A∙chik rangni daka rikaniko ripingna a∙dok sorkari committee ko songangaha jeon sak 28 member rang apsan bakrime kamrangko ka∙anggen. Ian batanggimin somoio A∙chik matgrikrangko gisik ra∙na tarigipa Cenotaph ko pe∙ani ja∙man ja∙ku de∙ani ong∙a.
Ia committee-ko Cabinet Minister Marcuise Marak skotong ong∙e dilanggen. Marak na agreba Deputy Speaker Timothy D Shira, Arts and Culture-ni Secretary in-charge RP Marak, GHADC-ni CEM Albiniush R Marak aro gipin dilgiparangkoba seokangaha.
Ia committee dingtang mancha A∙chik rangni ithias-o donggipa biaprangko name dake am∙sandianirangko dakangan baksana A∙chik rangni ku∙sik, daka rikaniko maikai ripingna aro namdapatna man∙ani bidingo kamrangko ka∙anggen.
