Da·al salo South West Garo Hills, Zikzak C&RD Block-ni ning·o donggipa Kamarpara Urban Health & Wellness Centre (UHWC) ko Mahendraganj-ni MLA Sanjay A. Sangma nokdonggae on·angaha. Ia nokdonggani somoio SDRC-ni Chairman Clement Momin, DMHO Dr. H Barman, Nokma, Village Health Council (VHC) ni member-rang , songni dilgiparang, medical fraternity-ni member-rang aro dingtang dingtang dolni dilgiparangba bakko ra·angaha.
Tom·anio MLA Sanjay A. Sangma aganengon, ia gitalgipa UHWC-ko a·bachengate on·anichi songdongenggipa manderangna nanggitikan somoio namgniko on·an baksana nengrabate sanna bannaniko ra·na man·gnok ine parakangaha. Sangma, ia gital Urban centre-o kam ka·giparangko songni manderang, a·jao sanna bannaniko dakgipa dolrang aro District Health Society baksaba nangrime kamrangko ka·china mol·molangaha.
Dr. H Barman, uni agananio ia center-o man·asienggipa namgnirangko parakange wilwilao donggipa songrango sae ding·e dongenggiparangna sanna bannaniko ra·nagita namgipa cholrangko on·gen ine aganangaha.
Kamarpara songni Nokma ia UHWC-ko ra·bae on·anina mittelpilskaan baksana ia center-o kamko ka·na gital kamo rimnapgiparangkoba an·tangtangko on·kange kamrangko ka·china mol·molangjolaha.
