Northeast a·dokrangni sakgni niksenggipa dilgiparangni politics-ni a·bao kattarangchi nanggrikani ja·mano Meghalaya BJP dolni Minister AL Hek, Northeast-o chonchongipa a·dokrangko tarianiko namnikpae aganangaha. Batanggimin salo Manipur-ni gitcham Chief Minister N. Biren Singh, Lt. P A. Sangma-ni 2014 bilsio Northeast-o chonchongipa a·dokrangko bikotna parliament-o agangipa kattarangko social media-o upload ka·ate Conrad Sangma-ko gipin a·dokni mamlao jakdangdike Manipur-ko nosto ka·na jotton ka·enga ine matnangataha.
Iani bidingo BJP dolni senior dilgipa AL Hek namnikpae aganatengon, ia dabianio maming ong·gijani dongja aro kakketgipa ong·a ine parakataha. A·chikrang aro Khasi-rangba an·tangtangna a·doktangko am·enga indide Meghalaya-o chonchongipa a·dokrangko taridapna dabianiora mai ong·gijani donga ine Hek sing·doangaha.
Sangma aro N Biren-ni gimin sing·on, ua ia mamlani bidingo maming bak dongja aro uni nangnikani Meghalaya-ni manderangna namgniko ra·baanisan ong·a, ine Hek aganangaha. Uamangni gisepo dingtangrikaniko u·ija aro mamingkon agana man·ja. Unbaksana, ian National People’s Party (NPP) aro BJP party-ni gisepoba maming bak nanga dongja ine Hek agandapangaha.
