Budbar walo North Garo Hills a·jani Mendipathar songjinmao patrol ka·enggipa police dolrangko sakgni manderang jemangan churing chupeke gari sale salgakna amani gimin police dolrangoni saksa mandeni ja·a samgnio slai gomananio saknaako man·angaha. Ia ong·gipa obosta-ara Budbar walni 11:30 mangni somoio ong·aha jeon Mendipathar bajar ni Pushpa Cloth Store ni sepang jolo Mendipathar Police aro CRPF dolrang patrol ka·aniko dakmiting ong·a.
Ia gipokgipa gari (AS 01 AM 7750) Mendipathar police station chipak-ni ta·rakbee salbaanichi police dolrang an·tangtangko naljokatna kate dongna nangaha ine parakataha.
Ia gari ko salgipa mandeara Thapa Darenchi songni Sengrim K. Sangma (28) ong·a ine u·ina man·aha. Police dolrangni agananigitade, ua a·damoni gariko sale katna jotton ka·e cholko ra·genchimoba chu·sokna man·jaha.
Dosi dakgipa manderangoni naljokna gita Police dolrang an·tangtangni ra·bitenggipa AK rifle-ko kulienba gari-ni do·gako kulina jotton ka·engon uamangni gari-oni ong·kate katna jotton ka·enganina AK-47 rifle-chi goanio gadopagipa Thapa Darenchi-ni Neobirth R Marak (28), uni ja·pingo saknaaniko man·aha.
Ia sakgni manderangara bilongbee churangko ringe pekanina Mendipathar PHC-ona watataha aro uamangni gari-oniko adita chu bottle-rangkoba man·aha. Ia dosi dakgipa gariko salenggipa driver-ni kosako niamgita sastiko on·a am·sandianiko dakna a·bachengatanikoba Police dolrang aganangaha.
