East Garo Hills a·jao donggipa Mangsang, Moronga A·king Nokmani ning·o songdongenggipa manderangni a·ako West Khasi Hills-chi km 10 batpile ra·srekdraengani gimin Mangsang jolni nangrimgimin NGO-rang baksana Nokma, Sordar aro songni manderang GHADC-ni CEM Albinush R Marak aro Deputy CEM Nikman Ch Marak-na chittiko sedoataha.
West Khasi Hills-chi ra·sekangenggipa songrangara Nongkingkil, Rengka aro Mogru song ong·a. Moronga A·king Nokma-ni ning·o songdongenggipa manderangna, Khasi-rang bang·a sinjetanirangko on·engani gimin songni manderang Nokma-ni kosako jegalaniko dakangaha. Unbaksana Moronga A·kingni ning·o donggipa manderang an·tangtangni nok jamrangko rikna ro·ong aro an·cheng salenggiparangniko aro Nengkram bajar cha·giparangoniko anti cha·a changanti Nokmarang niamgri tangka gile ra·an baksana bagan bari dake cha·enggiparangoniko kajina gile ra·enga ineba NGO dolrang aganangaha.
Bagan bari dakgimin aro a·a lekka donggimin-ni a·arangko West Khasi Hills-chi man·angengaha aro a·arangko Nokmarang ra·sekpilengaha ine NGO dolrang chittio janapangaha. Indake niam gri kam ka·aniko ninapjae, nangrimgimin NGO-rang aro Moronga A·kingni ning·o songdonggipa manderang re·anggipa February 26 tariko jinma tom·aniko ong·ate, Moronga A·king Nokmako ra·galna nanga ine jinma jak songe, ra·chaktokaha.
Ia ong·genggipa obostarangko Moronga A·king Nokma-ni kosako jegalenba, uko ra·gale gitalgipa A·king Nokmako songe on·china songni manderang aro NGO dolrang GHADC-ni CEM aro Deputy CEM-ko mol·molangaha.
