Body building-na gisiko nanggipa aro Mr. Meghalaya 2023 title-ko man·gipa Atlanta Shira Jaipur-o ong·atanggipa NPC Rajasthan 2025-o bakko ra·e national level-o chegipa ong·angaha. NPC Rajasthan 2025, International Bodybuilding Federation (IFBB) competition-ni ra·chakgimin ong·a aro ia chang susaaniko VGU campus Jagatpura Jaipur-o ong·ataha.
Shira, ia susaanio Gold-ko man·an baksana Overall Title-ko cheaha, unbaksana Classic Physique category-o gnigipa aro Men’s Physique-o gittamgipako cheangaha. Ia susaaniona India a·songni bang·a biaprangoni bakko ra·na sokbaaha jeon Shira-ba Meghalaya a·dokni palo saksa kamkam jinma baksa susaangaha.
Atlanta Shira, batanggimin salrangonin ia susaanio bakko ra·na be·entangko ranta ka·beaha aro jotton ka·aha. Uni miksongani namen sronga aro ian cheani ong·a. Ia national level-o susae cheanian Shira-ni tarisamsoani aro on·kanganiko mesoka, aro ian namgipa biteko man·a dakchakaha. Ua ia susaanio chu·sokgipa ong·anina aro National gadango chegipa ong·na uko dakchakgiparang pilakkon an·tangni social media-o jakkalgipa page-rango mittelpilangaha.
