West Garo Hills, Dalu C&RD block-ni ning·o donggipa Naronggre songo Solar-oni bijoli salaniko aro India a·songo skanggipa Electric Pressure Cooker (EPC) project-ko Chief Minister Conrad Sangma a·bachengate on·angaha.
Ia project-ko a·bachengate on·anichi songadam nokadamrango donggiparang dingtanganiko nikna man·gen, maina uamang bijoli dongjani a·selo salantian song·a chana gita am·bolosan pangchakna nanga. Ia project-ara songo noko am·bol so·aniko komiatna miksonge ra·gatgipa ong·a, ia project-ko Chief Minister Conrad Sangma dakchakanirangko on·e CSR-ni ning·o Global Himalayan Expedition (GHE) ni jako ra·e tarigipa ong·a.
Ia project -ni sokbana skangde songni me·chikrang am·bolrangko chimongna km 2 ba 3 mangnigita ja·achi re·ange sandina nange bang·a neng·nikanirangko man·an baksana buring bolgrimrangkoba nosto ka·aona sokata. Project-ko a·bachengate on·anichi songadam nokadamrango donggiparangna am·bol so·aniko komiate solar light aro Electric Pressure Cooker-ko jakkalskana man·genok ine Chief Minister Conrad Sangma aganangaha.
Global Himalayan Expedition (GHE) bilsi 6 mangna dingtangmancha a·dokni songadam nokadamrango kamrangko ka·ange hajal 20 mang beneficiary-rangna solar light, solar power, computer lab-rangko bang·a skulrangnan teke on·angaha. Re·anggipa 2024 bilsioba solar light tariani unit-ko Chief Minister an·tangan oprake on·angaha.
Ia Solar light aro Electric Pressure Cooker (EPC) ko a·bachengate on·angani somoio Salmanpara-ni MLA Botham Sangma aro Dalu-ni MLA Brening Sangma-ba dongpae bakko ra·angaha.
