Voice of the People’s Party (VPP) ni kosako kamrangko ka·anina North Shillong ni MLA Adelbert Nongrum aro party ni sak 4 member rangko kamoniko neng·takatangaha.
Adelbert Nongrum, Snarbor Laloo, Imti Jamir, Wilstone Sohshang aro Richinbusiness Marwein ni kosako re·anggipa March 1 tariko show cause notice on·gipao pangchake ia ja·kuko de·angaha ine VPP ni Vice President Kara H. Shen parakataha.
Party ni uamangna chitti sedoatgipana aganchakanirangko chu·onge nikjae aro an·tangtangni ka·gipa kamrangna maming dakgualaniko parakjanina VPP ni tarigimin Constitution ni Article III, Clause 5 aro Article XII rango pangchake kamtangtangoniko neng·takna tik ka·angaha.
Kamoniko neng·takatani somoio State Executive Committee ni rai on·ja dipet uamang party ni kamrango maming dakeba bak ra·na man·jawa ine u·iatangaha.
