Re·anggipa March 22-23 tariko SPSSA, Palghar, Mumbai-o ong·atanggipa chang 3-gipa All India BenchRest Shooting Competition-o ‘Elite BenchRest Shooters-NGH’ dolni sakdok member-rang bakko ra·angaha. Iamangara, Anthony D Marak, Davis Koksi Sangma, Jerash K Marak, Namsilchi Koksi Sangma, Rakku D Marak, aro Salchurak Arengh ong·a jemangan qualify ong·na nanggipa score-rangko bate ia susaanio man·angtokaha.
Uamangoni saksa, Davis K. Sangma, final result-o chu·gimik 250-oni 222 score-ko man·aha aro 88.8% points chi 18-gipa position-ona sokdoe top 20-ni ning·o ga·akaha. Sangma, Resubelpara-oni ong·a aro ua skanggipa BenchRest Shooting-ko jolo a·bachengdilgipaba ong·a. Ua 2024 bilsio ia sports-o bakko ra·na a·bachengaha aro uni skanggipa jotton ka·anio training-ko ra·e 62% score-ko man·baaha. Sangma, songtangchina re·bapile uni ripengska sak 6 ko rime ge·sa dolko bikotenba jringnan gisiko nange ranta ka·dilaha jean uamangko ia 3-gipa All India BenchRest Competition 2025-o bakko ra·na ka·donganiko on·aha.
BenchRest Shooting mingsa gosusaani sports ong·a aro iano chel·aniko gona man·gipa rifle-chi table ba bench-rango gatchake gosusaa. Ia sports-o, nisanrangko dona jekon gisiko nanganichi aro bang·a neng·nikanirang jekai balwa, position aro slaiko taritaitaie gona nanga.
Elite BenchRest Shooter-NGH dol, ia susaanio bakko ra·e da·o ia sports-ko dal·rorona bakrimpachina mol·molataha. Ia sports-o manderangko bakko ra·chinaba didianiko on·ataha. Unikoa, ia sports-ni bidingo Garo Hills-ni manderangna changa sapaniko on·a aro cholko ra·bana dingtang dingtang bakrangona re·anggen ine uamang parakataha.
