Professor Dr. Fameline K. Marak ko NEHU Tura Campus ni gital Pro Vice-Chancellor (PVC) songanina NEHU Tura Campus ni Post Graduate Students’ Union (PGSU) uamangni mittelpilskaaniko aganangaha. Ian dingtang mancha ru·uta sal somoirangna dabianggipa aro nangnikgipa ong·a maina NEHU ko batanggimin bilsi 4 na Director-in-Charge ni gadangonisa chalaiangaha.
Garo Hills-o chugipa gadangni bidako on·a bilsi 30 ong·nasipile NEHU Tura Campus pakwatangenchimoba Pro Vice-Chancellor dongjani a·sel administrative aro pora skiani bidingo adita neng·nikanirangko chagrongangaha. Campus ni ning·ao adita kamrangko Director-in-Charge nirokatna bil donggenchimoba university ni skotong Shillong-o rai ra·anio chu·gimik bil dongja.
NEHU Tura Campus-o Professor Dr. Fameline K. Marak ko PVC songanichi university ni bidingo chanchirimani aro hukum ba rai ra·anio ku·rang on·angna man·an baksana Marak saksa university ni governing body ni member ba ong·e mikkangchi campus ni nanganirangna, bida pakwataniko nambatatna aro rika cho·anirangko ta·rakatnaba university na dakchakani ong·gen.
Ru·uta bilsirangna NEHU Tura Campus bang·a neng·nikanirangko chagrongna nangaha. Hajal ni hajal poraienggipa chatro chatrirangna bida ni nok ong·genchimoba campus ni ning·o kragipa rika cho·anirang, hostel rang chu·onggijani, faculty aro staff rangko somoigita kamna rimnapgijani, namgipa departmental building rang donggijani aro laboratory ni chu·onggijanirangko nikna man·a. Ia pilak neng·nikanirangko nirokatna gitalgipa PVC ko songanian gamchatbegipa ja·ku de·ani ong·a.
Chatro chatrirangni palo aganchakengon, campus ni ning·o gimik gadangrango development ko ra·bana gitalgipa PVC baksa apsan meli-bakrime union kam ko ka·anggen ine PGSU ni President Chakram D. Sangma aganangaha. Ia ja·ku de·anian bida pakwatani gadangko nambatatna aro gipin nangchongmotgipa kamrangkoba campus ona ra·bana dakchakanggen ine chatro chatrirang uamangni ka·dongsoaniko parakataha. Professor Dr. Fameline K. Marak ko dingtang mancha rimchaksoani kattarangko aganan baksana uni u·ianio pangchake re·dilanio NEHU Tura Campus ona namroro silroroaniko ra·bachina uamangni namgipa skaniko on·angaha.
